EN
— Tatlong-beses na kampeon sa Grand Slam na si Angelique Kerber, inanunsyo nitong Huwebes na magreretiro na siya pagkatapos ng Paris Olympics.
Ang 36-anyos na manlalaro mula Germany ay nanalo ng major titles sa lahat ng torneo maliban sa French Open sa Roland Garros — kung saan siya magpapaalam sa tennis pagkatapos ng Paris Games. Makakatapat niya sa unang round ang apat na beses na major winner na si Naomi Osaka mula Japan.
"Bago pa magsimula ang Olympics, masasabi ko na hindi ko makakalimutan ang Paris 2024, dahil ito na ang huli kong professional na torneo bilang tennis player," ani Kerber sa Instagram. "At kahit na ito ang tamang desisyon, hinding-hindi ito magiging ganoon ang pakiramdam. Dahil mahal na mahal ko ang sport at nagpapasalamat ako sa lahat ng alaala at oportunidad na ibinigay nito sa akin."
Kinumpirma ni Kerber ang kanyang pagreretiro sa isang maikling pahayag matapos ang Olympic tennis draw. Ang mga unang laban ng men’s at women’s ay magsisimula sa Sabado.
Nanalo si Kerber ng Australian Open at U.S. Open noong 2016 — ang taon na umabot siya sa No. 1 sa rankings at nagkaroon ng silver sa singles sa Rio de Janeiro Games. Nanalo rin siya ng Wimbledon makalipas ang dalawang taon.
"Ang Paris 2024 ay magiging finish line ng pinakakamangha-manghang paglalakbay na pinangarap ko habang lumalaki akong may hawak na raketa," sabi ni Kerber. "Marami pa akong gustong sabihin at pasasalamatan, na gagawin ko kapag natapos ko na ang huling laban ko. Pero sa ngayon, sisiguraduhin kong masusulit ang bawat segundo ng huling episode ko sa court."
Pinuri ng International Tennis Federation president na si David Haggerty ang "stellar career" ni Kerber at ang kanyang kontribusyon sa laro.
"Ang kanyang individual record ay nagsasalita para sa sarili nito at ang kanyang 18 Billie Jean King Cup team nominations ay nagpapakita kung gaano siya kahalaga sa Germany sa mga nagdaang taon," ani Haggerty. "Nagsimula siya sa Olympics noong London 2012, at alam kong ang pagkapanalo ng silver sa Rio 2016 ay katuparan ng isang pangarap para sa kanya. Kaya nararapat lamang na tatapusin niya ang kanyang karera suot ang kulay ng kanyang bansa sa Paris 2024."