EN
— Lumakas na si Bagyong Dindo at naging isang tropical storm, ayon sa Philippine Atmospheric, Geophysical and Astronomical Services Administration (Pagasa). Inaasahang lalabas ito ng Philippine Area of Responsibility (PAR) ngayong umaga, Lunes, August 19.
Ayon sa Pagasa, si Dindo ay may maximum sustained winds na umabot ng 65 kph malapit sa gitna, na may pagbugsong umaabot ng 80 kph, at kumikilos ito pahilaga sa bilis na 10 kph. Wala pang naitataas na tropical cyclone wind signals dahil sa bagyong ito.
Hindi inaasahan na direktang maaapektuhan ng bagyong ito ang weather conditions sa bansa, ayon pa sa Pagasa. "Si Dindo ay magpapatuloy na gumalaw patungong hilaga at lalabas ng PAR sa susunod na anim na oras. Pagkalabas ng PAR, ito ay magtutungo sa East China Sea patungo sa Korean Peninsula o silangang baybayin ng China," dagdag pa ng Pagasa.
Bagama't nananatili sa kategorya ng tropical storm, hindi inaasahan ang paglakas ni Dindo, at maaaring humina ito pagkalampas ng 24 oras.