EN
—Bagyong Kristine ay patuloy na lumalakas at inaasahang tatama sa Hilagang Luzon ngayong gabi o bukas ng umaga, ayon sa PAGASA. Ang bagyo ay posibleng maging severe tropical storm bago mag-landfall sa Isabela o Aurora, dala ang lakas na 75 kph at bugso na aabot sa 90 kph.
Kasalukuyang nasa 390 km silangan ng Daet, Camarines Norte, si Kristine, at kumikilos pa-kanluran hilagang-kanluran sa bilis na 15 kph. Itinaas na ang tropical cyclone wind Signal No. 2 sa ilang bahagi ng Luzon, habang naka-Signal No. 1 naman ang Metro Manila, Calabarzon, at iba pang bahagi ng Luzon at Visayas.
Malawak na Epekto ng Bagyo
Apektado ang buong Luzon at ilang bahagi ng Visayas ng ulan at bugso ng hangin na dala ni Kristine. Nakaalerto rin ang mga komunidad sa Zamboanga, Mindanao, at Soccsksargen para sa mga pag-ulan dahil sa trough ng bagyo.
Pinayuhan ng mga awtoridad ang mga residente na manatiling alerto sa posibleng pag-ulan, pagbaha, at landslide. Ayon kay DILG Secretary Jonvic Remulla, naka-preposition na ang mga LGU sa Luzon para harapin ang mga posibleng epekto ng bagyo. "Kahit hindi pa tiyak ang final path ni Kristine, handa na ang mga LGU at civil defense units," ani Remulla.
Naka-Standby ang mga Opisina at Ospital
Sa mga ospital at health facilities, itinaas na rin ang "code white alert" sa Calabarzon. Nakahanda na ang mga medical staff upang tugunan ang mga emergency na dulot ng bagyo.
Samantala, sinuspinde na rin ang klase sa ilang mga lugar kabilang ang Metro Manila, Bulacan, Pangasinan, at Negros Occidental. Mahigit 17,000 paaralan na may 7.3 milyong estudyante at 344,000 guro ang apektado.
Pagbaha at Paglikas
Sa Negros Occidental, nagkaroon ng flash floods sa ilang barangay, dahilan upang lumikas ang mga pamilya. Sa Zamboanga del Norte, nasira ang mga bahay malapit sa baybayin dulot ng malalakas na alon at hangin. Isa ring bata ang nalunod sa kasagsagan ng ulan at alon.
Lahar Alert
Nagbigay ng babala ang Phivolcs para sa mga komunidad malapit sa Bulkang Mayon. Ayon sa kanila, posibleng bumuhos ang lahar kapag malakas ang pag-ulan na dala ni Kristine, partikular sa mga ilog sa paligid ng bulkan.
Habang papalapit si Kristine, patuloy ang paalala ng mga awtoridad na manatiling ligtas, sumunod sa mga alerto, at maghanda sa posibleng evacuation.
READ: Pitong Rehiyon, Nasa Pinakamataas na Emergency Protocol Dahil kay Bagyong Kristine