EN
— Matapos ang kanilang unang PBA championship sa Philippine Cup, kumpiyansa si Meralco center Brandon Bates na kaya nilang muling makuha ang titulo sa Season 49 ng PBA.
Lalo na ngayon na bumalik na si Allen Durham para pangunahan ang koponan.
Sa pagsisimula ng PBA Season 49 ngayong Linggo, sisimulan ng Bolts ang kanilang kampanya sa Governors’ Cup laban sa Magnolia Hotshots sa ganap na 7:30 p.m.
Ang 6-foot-9 na si Bates, na isa sa mga susi sa pagkapanalo ng Meralco sa Philippine Cup noong nakaraang season, ay nagsabing tiwala siya sa kanilang kakayahan na muling magwagi ngayong season.
“Meron kaming sobrang solid na import [kay Durham]. At napaka-bait na tao pa niya. Kaya sobrang tiwala ako,” pahayag ni Bates sa isang interview sa vivo 3x3 basketball challenge noong Sabado.
“Same pa rin ang team namin, at nadagdagan pa ng isa sa pinakamahusay na import na nakita ng liga, kaya sobrang excited at tiwala kami sa aming tsansa,” dagdag niya.
Matapos ang ilang seasons sa abroad, bumalik si Durham sa Bolts ngayong season.
Tatlong Best Import of the Conference awards na ang kanyang napanalunan noon, pero hindi niya nadala ang koponan sa kampeonato.
Ngunit ngayon na intact ang championship core ng Meralco at may dagdag pang rookie na si CJ Cansino, naniniwala si Bates na kaya nilang makuha ang matagal nang inaasam na import-laden title.
At sa kung paano binuo ang kanilang team, binigyang-diin ni Bates na ang kanilang layunin ngayong season ay makuha ang championship sa lahat ng tatlong conferences.
“[Championships sa] lahat ng tatlong [conferences,] syempre. Target namin grand slam.”
READ: PBA Governors' Cup Opening Week