EN
— Ibinuhos ng Capital1 Solar Spikers ang kanilang puso’t lakas sa isang pangmalakasang laban kontra Nxled kahapon sa PhilSports Arena. Sa kabila ng mabigat na umpisa at tatlong sunod na talo sa PVL All-Filipino Conference, binago nila ang kwento sa isang nakakamanghang pagbawi.
Mula sa 21-25 talo sa unang set at 15-20 pagkakabaon sa ikalawang frame, bumangon ang Solar Spikers sa likod ng napakalupit na 10-1 run. Pinagtibay nito ang kanilang momentum upang ipanalo ang laban sa iskor na 21-25, 25-21, 25-15, 25-18.
“Ang laki ng lamang nila kanina. Pero, swerte nakabangon kami,” ani Coach Roger Gorayeb, na hinangaan ang puso ng kanyang koponan.
Ang beteranong spiker na si Heather Guino-o ang bida ng laban matapos kumamada ng 21 puntos. Pinuri rin niya ang tiwala ni Gorayeb sa kanyang kakayahan.
“‘Di ko sinayang ‘yung chance na binigay ni coach. Todo-laro lang talaga,” ani Guino-o, habang pinatunayan ni Gorayeb ang kanyang paniniwala: “Sabi ko sa kanya, eto na, huwag mo sayangin. Kailangan mo maniwala sa sarili mo.”
Bukod kay Guino-o, umarangkada rin ang rookie na si Leila Cruz na naghatid ng 17 puntos, habang ang veteran presence ni Patty Orendain ay nagbigay ng solidong 10 markers. Sa depensa naman, umeksena si Roma Doromal sa 10 digs na tumulong sa koponan upang magtagumpay.
Tiyak na hindi lang init ng araw ang dala ng Capital1 Solar kundi pati init ng determinasyon sa laban.