EN
– Sino mag-aakala?
Maliban sa mga may-ari ng Capital1 Solar na sina Milka at Mandy Romero at ang beteranong coach na si Roger Gorayeb, wala talagang naniniwala na makakagawa ng ingay ang Solar Spikers sa Premier Volleyball League Reinforced Conference.
Pero isang bagyong gabi, isang di-malilimutang Martes sa PhilSports Arena, pinatunayan ni Gorayeb at ng kanyang mga matapang na Solar Spikers na mali ang mga duda ng karamihan.
Sa isang makapanindig-balahibong laban, tinalo nila ang defending champion at two-time Reinforced Conference titlist na Petro Gazz sa score na 26-24, 25-20, 25-18. Ito ang unang panalo ng Capital1 ngayong conference at nagdala ng respeto na matagal na nilang inaasam.
“Who would have thought na mai-i-straight sets namin sila? Lagi kaming tinitingnan na low-level team, tapos ngayon na-straight sets namin ang isang mas experienced na team,” sabi ng emosyonal na si Gorayeb.
“Malaking bagay ‘to sa amin, morale-booster ‘to sa mga bata,” dagdag niya.
Kasabay nito, sinuspinde ng liga ang mga laro ngayong Huwebes dahil sa masamang panahon.
Binanggit ni Gorayeb na ang kanilang matibay na depensa at isang lethal weapon mula Russia — si Marina Tushova — ang mga susi sa kanilang tagumpay.
“Anlakas ng depensa namin, maski ako nagulat. Last time, struggling kami sa counter-attack. Ngayon hindi kami nag-struggle kaya masaya ako,” sabi ni Gorayeb, na natalo sa Akari, 25-18, 27-25, 22-25, 25-14, sa kanilang unang laban noong Huwebes.
“Si Marina (Tushova) sinapian yata, birthday yata niya. Ang ganda ng laro niya,” dagdag niya, patungkol sa kanyang import na nagpakitang-gilas ng 24 points.
Ang maagang tagumpay na ito ay mas naging espesyal dahil ang team ay nabuo lamang anim na buwan ang nakalilipas nang magtiwala ang mga sports-loving na Romero sisters sa kakayahan ni Gorayeb bilang mentor.
Ngayon, naibalik ni Gorayeb ang tiwala sa pamamagitan ng resulta.