EN
— Nakitaan ng kinang si Pauline del Rosario pero hindi niya na-sustain ang momentum, nagtapos siya ng isang under-par 71 sa Tuscaloosa Toyota Classic sa Alabama nitong Biyernes (Sabado sa Pilipinas).
Bagamat maganda ang simula, natagpuan niya ang sarili anim na palo sa likod ng mga lider matapos ang unang 18 holes.
Nag-umpisa si Del Rosario sa likod ng siyam na butas ng Ol’ Colony Golf Complex, bumangon mula sa maagang bogey sa par-4 13th, bumawi ng birdies sa par-5 14th at sa masalimuot na par-3 17th.
Nakuha ang ritmo nang gumawa ng birdie sa par-5 3rd, pinakita ang kanyang lakas at galing sa mahabang mga butas. Ngunit unti-unti nang nagparamdam ang pressure.
Hindi na-maximize ni Del Rosario ang birdie chance sa par-5 seventh, at nagtapos ang kanyang round sa isang bogey sa ninth matapos hindi magtagumpay sa up-and-down na attempt.
Sa kasalukuyan, bumaba siya sa tie sa pang-40 na puwesto, kasama ang 12 iba pa, anim na palo ang layo mula sa mga lider, na may natitirang 36 holes pa sa Epson Tour event.
Samantala, sa tuktok ng leaderboard, umarangkada si Ashley Lau ng Malaysia na nagtala ng malinis na 65, kasama sa three-way tie sa liderato sina American Cydney Clanton at Ana Belac ng Slovenia.
Ang trio ay may dalawang palong kalamangan sa grupo na kinabibilangan nina Becca Huffer (USA), Sophie Hausmann (Germany), Siyun Liu (China), at Ingrid Lindblad (Sweden), na pawang nagtapos ng 67.
Samantala, nahirapan si Clariss Guce, dalawang beses na Epson Tour champion, matapos mag-post ng 73 sa kanyang unang round, lagpas sa projected cutoff line ng 72.
Masusubukan ang kanyang determinasyon sa ikalawang round.