EN
Sa harap ng mga puna sa social media tungkol sa pagdami ng academic awards sa mga graduation at moving-up ceremonies ngayong pagtatapos ng school year 2023-2024, nagbigay linaw ang Department of Education (DepEd) sa layunin ng kasalukuyang sistema ng parangal sa ilalim ng K-12 program.
Ayon kay DepEd Assistant Secretary Francis Cesar Bringas sa isang panayam sa TeleRadyo Serbisyo, "Ang ganitong uri ng sistema ng parangal ay lubos na nakaka-engganyo sa ating mga mag-aaral na magsikap. Mas inclusive ito dahil hindi ito limitado sa top 10 ng klase."
Ipinagtanggol ni Bringas ang sistema sa gitna ng batikos na hindi akma ang dami ng parangal sa mababang performance ng mga estudyanteng Pilipino sa Program for International Student Assessment (PISA). Sa resulta ng PISA 2022 na inanunsyo ng Organization for Economic Cooperation and Development (OECD) noong Disyembre, ang mga 15-anyos na estudyanteng Pilipino ay nasa ilalim pa rin ng 76th sa 81 bansa pagdating sa reading comprehension, mathematics, at science.
Sinabi ni Bringas, "Magkaiba ang parameters ng PISA at ng ating awards system sa paaralan. Kaya't hindi natin puwedeng ikumpara ang resulta ng classroom performance sa international large-scale assessments."
Simula nang ilunsad ang K-12 program noong 2016, tinanggal na ang mga titulong "valedictorian," "salutatorian," at "honorary mention." Sa bagong sistema, awtomatikong binibigyan ng "with honors" ang mga estudyanteng may average grade na 90-94, "with high honors" sa may 95-97, at "with highest honors" sa mga nakakuha ng 98-100.
"Dati, nagkakaroon ng kompetisyon sa pagitan ng mga mag-aaral para sa titulong valedictorian at salutatorian. Ngayon, sa bagong grading system, ang kalaban mo ay ang sarili mo. Kung maabot mo ang standards, ikaw ay makikilala," dagdag ni Bringas.
Subalit, ayon sa Teachers Dignity Coalition (TDC), kailangan ng pagsusuri sa kasalukuyang sistema para makagawa ng mas pantay-pantay at tiyak na grading standards. Ayon kay TDC national chairperson Benjo Basas, may mga pagkakaiba sa grading standards ng iba't ibang paaralan base sa karanasan niya sa mga transferee students.
Ani Basas sa isang panayam sa ABS-CBN News, "Ang ibang transferee students ay may mataas na grado mula sa kanilang dating paaralan pero mababa ang learning competencies." Ipinaliwanag din niya na ang grades ay hindi lamang batay sa exam scores kundi pati na rin sa mga subjective output gaya ng art projects, acting performances, sports, at oral communication skills.
Sa kabila ng mga ito, nananatiling layunin ng DepEd na itaguyod ang isang sistema ng parangal na nagpo-promote ng personal growth at hindi lamang kompetisyon sa pagitan ng mga mag-aaral.