EN
— Boses ni Novak Djokovic ang lumabas ngayong Sabado, kung saan nanawagan siya para sa mas klaro at standardized na protocols sa tennis doping cases. Ito'y matapos mapawalang-sala si Jannik Sinner kahit na nag-positibo siya sa dalawang beses na drug tests ngayong taon.
Ayon kay Djokovic, na naghahanda para ipagtanggol ang kanyang US Open title, may valid point ang mga manlalaro na nagpapahayag ng dismay sa transparency ng Sinner case.
“Naiintindihan ko yung frustration ng mga players dahil sa lack of consistency,” wika ng 24-time Grand Slam champion.
“As I understood, na-clear agad ang kaso niya nung na-announce ito. Pero alam mo yun, mga limang o anim na buwan na ang lumipas mula nang malaman niya at ng kanyang team yung balita,” dagdag ni Djokovic.
Para kay Djokovic, tila may mga butas sa sistema. “Makikita natin ang kawalan ng standardized at malinaw na protocols. Naiintindihan ko ang sentiments ng mga players na nagdududa kung pantay-pantay ba ang trato sa kanila,” sabi niya.
May ilang manlalaro ang nag-udyok na tila binigyan ng special treatment si Sinner dahil sa kanyang ranking, at tinanong kung bakit hindi siya agad suspendido habang iniimbestigahan pa.
Ayon kay Sinner, pareho lang daw ang proseso sa kanya tulad ng ibang players. “Walang shortcut, walang special treatment, pare-pareho lang ang proseso,” sabi ng 23-anyos na Italian player.
Noong Marso, nagpositibo si Sinner para sa mababang level ng clostebol, isang banned anabolic agent, sa Indian Wells Masters. Muling nagpositibo siya sa isang out-of-competition test makalipas ang walong araw.
Ayon kay Sinner, pansamantala siyang sinuspinde ng ilang araw, pero hindi ito naging publiko noong mga oras na iyon. Agad naman nilang inakyat ang kaso, sinasabing ang drug ay pumasok sa kanyang katawan dahil sa isang spray na ginamit ng kanyang physiotherapist para gamutin ang sugat.
Sa kabila ng lahat, pinayagan si Sinner na magpatuloy sa paglalaro habang iniimbestigahan ang kaso, at noong Martes ay inanunsyo ng International Tennis Integrity Agency na siya'y wala palang kasalanan.
Tinanggal naman ni Sinner ang kanyang physiotherapist na si Giacomo Naldi at trainer na si Umberto Ferrara, na nag-supply ng spray, dahil sa pagkawala ng tiwala.
Samantala, sinabi naman ni Carlos Alcaraz, world number three, na tila may mga bagay na hindi alam ng publiko tungkol sa kaso, pero hindi niya pinuna ang desisyon ng ITIA.
Ayon kay Djokovic, ang ganitong kaso ay dahilan kung bakit kailangan ang Professional Tennis Players Association na itinatag niya para mabigyan ng mas malakas na boses ang mga manlalaro sa sport.
“Hindi ko alam, baka nga may mga kaso na na-reresolba nang tahimik tulad nito dahil lang sa player na may kakayahang magbayad ng mahal at mabilis na legal na representasyon, habang ang ibang players ay walang ganitong kakayanan,” dagdag ni Djokovic. "Kailangan natin itong imbestigahan ng mas malalim para matiyak na pantay-pantay ang treatment sa bawat player, anuman ang kanilang ranking o status."
READ: Djokovic at Alcaraz, Magkaibang Parte ng US Open Bracket