EN
— Bilang tugon sa tumataas na bilang ng kaso ng leptospirosis, pabor si Health Secretary Ted Herbosa sa pagpasa ng ordinansa na magbabawal sa paliligo sa baha. "Kailangan na talagang iregulate ito," ani Herbosa sa isang ambush interview sa Malakanyang.
Mabilis ang pagdami ng mga kaso, lalo na matapos ang Typhoon Carina at ang walang-humpay na habagat, na nagdulot ng malawakang pagbaha. Ilang gymnasium nga sa mga hospital tulad ng National Kidney and Transplant Institute sa Quezon City ay ginawa nang pansamantalang ward para sa mga pasyente.
Sa ngayon, may apat na katao na ang pumanaw mula sa leptospirosis nitong nakaraang dalawang araw lamang. Ayon kay Herbosa, simple lang naman daw ang paraan para maiwasan ito—huwag maligo sa baha. Ang sakit na ito ay nakukuha sa ihi ng daga na sumasama sa tubig-baha, kaya dapat na talagang pagtuunan ng pansin ang usaping ito.
Kausap na rin ng DOH ang Metro Manila Development Authority (MMDA) para magsagawa ng hakbangin na maglilimita sa paliligo sa baha, at pati na rin ang tamang pamamahala ng basura para maiwasang gawing pugad ng mga daga.
Kahit na tila hindi pa ramdam ang krisis, tiniyak ng DOH na sapat pa rin ang mga hospital beds para sa mga pasyente. Dagdag pa nila, mayroong sapat na supply ng doxycycline sa merkado at mga health centers para sa paggamot ng leptospirosis. Ngunit, kailangang mas mapigilan ang pagdami ng mga kaso para hindi na lumala pa ang sitwasyon.
READ: Mga Ospital, Handa na sa Pagsirit ng Kaso ng Leptospirosis — DOH