EN
— Inalis na ng Department of Health (DOH) ang Code Blue alert matapos bumaba ang mga kaso ng pertussis at tigdas.
Sa gitna ng pagbaba ng mga kaso ng pertussis at tigdas, tinapos na ng DOH ang Code Blue alert na dating itinaas upang magbigay babala sa publiko ukol sa mga sintomas at epekto ng mga sakit na ito.
Isang public health emergency operation center ang naitayo sa pambansang antas upang masubaybayan at masugpo ang mga kaso. Sinundan ito ng pinaigting na kampanya sa pagbabakuna, sa pangunguna ng DOH at mga lokal na opisyal.
Base sa datos, ang mga kaso ng pertussis mula Mayo 12 hanggang 25 ay bumaba ng 38 porsyento kumpara sa mga kaso mula Abril 28 hanggang Mayo 11. Mula sa 301 kaso, naging 187 na lang ito sa nasabing panahon.
Samantala, ang mga kaso ng tigdas-rubella ay nagpakita ng plateauing na trend. Mula sa 283 kaso noong Abril 28 hanggang Mayo 11, bumaba ito sa 178 mula Mayo 12 hanggang 25, o pagbaba ng 37 porsyento.
"Malayo ito sa bilang ng mga kaso nang itinaas ang Code Blue alert noong Marso 20. Ang alerto ay nagpatindi ng mga aktibidad para mapigilan ang pagkalat ng virus sa pamamagitan ng bakuna, micronutrient supplementation, community engagement, at risk communication," pahayag ng DOH.
Iniulat ng Bangsamoro region na ang mga kaso ng tigdas-rubella ay nag-stabilize matapos makapagtala ng 58 porsyentong pagbaba.
"Ang measles outbreak response immunization sa Bangsamoro region ay naging matagumpay, kung saan at least 1.2 milyon katao o 87.9 porsyento ng eligible population ang nabakunahan," sabi ng DOH.
Ayon sa DOH, ang pinaigting na kampanya sa pagbabakuna at pakikipag-ugnayan sa komunidad ang nagresulta sa pag-deactivate ng Code Blue alert.
Ang pertussis ay isang matinding impeksyon sa respiratory system na dulot ng bacteria na bordetella pertussis. Delikado ito, lalo na sa mga sanggol at bata na posibleng magkaroon ng malubhang sintomas at komplikasyon.