EN
– Hindi pa tapos ang kwento ni Dottie Ardina sa Olympics, lalo na sa isyu ng uniforms na umani ng iba’t ibang reaksyon online.
Sa isang Facebook post, nagpasalamat si Ardina sa mga sumuporta sa kanila ni Bianca Pagdanganan. Bagama’t hindi nakakuha ng medalya, ipinaglaban nila ang bandila ng Pilipinas hanggang dulo.
“Napakalaking karangalan ang mag-representa ng Pilipinas,” ani Ardina sa Filipino. Ngunit nagtaka siya kung bakit siya pa ang kinuwestyon dahil sa pagpapahayag ng kanyang frustration tungkol sa uniform. Ang video na ini-upload ng kanyang ina ay agad nag-viral, kung saan maraming netizens ang sumang-ayon sa kanyang nararamdaman at kinondena ang mga responsable.
“Hindi po ako nagsalita agad dahil nasa gitna ako ng laban. Pero habang tumatagal, parang ako pa ang napagbibintangan. Sinabihan pa ako na alisin ang video, pero hindi ito ginawa ng mommy ko. Ngayon, nais ko lang magbigay ng linaw,” paliwanag ni Ardina.
Ayon sa golfer, ang kanyang mga sinabi ay base sa personal na karanasan. Hindi niya raw inaasahan na lalaki ito at maging national issue. “Bago pa ito lumaki lalo, gusto ko sanang linawin ang mga ilang bagay na lumabas sa official statements ng POC at NGAP,” dagdag niya.
Timeline ng Pangyayari
Ikinuwento ni Ardina na ang final tournament list para sa Olympic golf ay lumabas noong June 25, pero noong June 13 lang siya pinadalhan ng POC ng uniform size forms at mga detalye ng visa exemption. Habang nasa US siya para sa LPGA tournaments, inusisa niya ang tungkol sa uniforms at golf bag noong July 28. Sinabi sa kanya na dadalhin ang golf bag at ang uniforms ay darating diretso sa Paris ng July 31.
“What if mali ang sukat o hindi bagay?” tanong niya.
Kahit may dalang plain shirts bilang backup, pagdating niya sa Paris noong August 2, wala pa rin ang uniforms. Noong August 4, sa registration ng tournament, pinagalitan sila ng IOC officials dahil wala silang suot na required uniforms.
“Nagdahilan na lang po ako na hindi pa dumadating. Sa hapon ng Aug. 4, dumating na rin ang uniforms, pero mga track suits lang ito. Natakot ako na wala pa rin ang competition shirts,” pagbabalik-tanaw ni Ardina.
Ang replacements na dumating ay dalawang collared shirts na puti at itim, ngunit hindi pang-golf. “Masaklap pa, mali ang stamp ng PHI logo dahil nasa ilalim ng collar at natatakpan. Walang nagawang tama. Bukod sa walang uniforms, wala ring na-provide na golf balls, head covers, gloves, at golf umbrella. Mabuti pa’t may dala kaming sarili. Di ko maisip kung bakit walang budget para sa mga gear na iyon,” dagdag niya.
“Bakit parang ako pa ang binaligtad?” tanong ni Ardina.
Huling Resulta
Nagsuot na lang sila ng plain shirts at nagbahaginan ng patches para magtugma ang kanilang suot.
Noong Aug. 6, bago mag-umpisa ang tournament, pumunta pa si Ardina sa mall para bumili ng shirts at umbrella para magka-terno sila ng teammate niya.
Sa official statements ng POC, sinabing may uniforms na ipinadala, ngunit mas pinili ng athletes na hindi ito isuot. Ayon naman sa NGAP, may paparating na replacements, pero mas pinili ni Ardina na bumili na lang ng sarili.
‘Nakakahiya'
Ayon kay Ardina, nakakahiya dahil maraming tao ang nakapansin sa kanilang sitwasyon. Sa isang practice round, pinagalitan pa sila ng IOC official dahil bawal gamitin ang golf brands sa head covers. Napilitan silang takpan ito ng duct tape. “Lahat ng kalaro namin dito, national flag ang design ng head covers,” kwento niya.
“Pero kami lang ang team na walang uniforms. Tayo lang ang nahirapan sa rules,” dagdag niya nang may halong sarcasm.
Real Story Untold
Nagdesisyon si Ardina na magsalita na dahil wala pang balita na lumalabas maliban sa official statements mula sa POC at NGAP.
“Nagawa ko po ang video dahil po sa frustration. Hindi ko alam kung makakacompete pa ako sa susunod na Olympics, kaya gusto ko magsalita para sa mga susunod pa sa amin,” sabi ni Ardina.
‘Future Athletes Deserve Better’
Sinabi ni Ardina na hindi niya nais gumawa ng gulo kundi magbigay ng mas magandang karanasan para sa mga susunod na atleta.
“Sana magbago ang patakbo. Sana magkaroon ng maayos na communication sa pagitan ng mga officials at ng mga atleta. Sana wala nang Pilipinong atleta ang magmukhang kawawa,” pagtatapos ni Ardina.
READ: Pagdanganan, Muntik na sa Medalya; Ardina, Pinahanga ang PH sa Impressive Olympic Finish