EN
— Alex Eala, kinapos sa kanyang laban para makapasok sa main draw ng US Open matapos matalo kontra kay Elena-Gabriela Ruse ng Romania, 6-3, 1-6, 4-6, sa qualifying round noong Biyernes ng umaga (oras sa Pilipinas).
Kailangan na lang ni Eala ng isang set para sa makasaysayang Grand Slam main draw sa New York, pero nahirapan siya sa laban dahil tila may iniindang injury sa ikalawang set.
Matapos ang isang matinding upset win kontra kay Nuria Parrizas-Diaz ng Spain sa ikalawang round ng qualifiers, mabilis na kinuha ng Filipina ang unang set, 6-3.
Pero sa ikalawang set, nahanap ni World No. 123 Ruse ang kanyang ritmo, umabante ng 4-0.
Nakasagot si Eala at nagkaroon ng score, 1-4, ngunit bigla siyang humingi ng medical timeout para ipagamot ang kanyang kaliwang binti.
Hindi na pinakawalan ng 26-anyos na Romanian ang pagkakataon at naipuwersa ang ikatlong set.
Sa huling set, nagpalitan ng puntos ang dalawa at naging dikit ang laban sa 3-3. Pero nakuha ni Ruse ang susunod na dalawang games, 5-3.
Nagbalik si Eala sa laro at walang inaksayang pagkakataon sa ikasiyam na game, pero isang matinding ace mula sa Romanian ang nagtapos sa pangarap ng 19-anyos na Filipina para sa US Open.
Ilang beses na rin itong nangyari kay Eala—isang panalo na lang ang kulang para sa Grand Slam. Natalo rin siya sa third round ng qualifiers sa French Open at Wimbledon, laban kina Julia Riera at Lulu Sun.