EN
– Lampas dalawampu na!
Tumaas na sa 20 ang delegasyon ng Pilipinas sa Paris Olympics matapos mapabilang sina golfers Bianca Pagdanganan at Dottie Ardina sa top 60 cutoff, swimmers Kayla Sanchez at Jarod Hatch sa universality places, at judoka Kiyomi Watanabe sa continental quota.
May posibilidad pang madagdagan ang bilang na ito, lalo na sa track and field, kung saan umaasa ang bansa na makakasali sina hurdlers John Cabang Tolentino at Lauren Hoffman.
Ang limang bagong dagdag na ito ay sasama sa koponang kinabibilangan nina pole-vaulter EJ Obiena, mga boksingero na sina Nesthy Petecio, Carlo Paalam, Eumir Marcial, Aira Villegas at Hergie Bacyadan, gymnasts na sina Carlos Yulo, Aleah Finnegan, Levi Ruivivar at Emma Malabuyo, mga weightlifters na sina Vanessa Sarno, Elreen Ando at John Ceniza, rower na si Joanie Delgaco, at fencer na si Sam Catantan.
Nalampasan ng bilang na ito ang 19 na Filipino athletes na lumahok sa 2021 Tokyo Games kung saan nakamit ng bansa ang kauna-unahang Olympic gold medal sa pamamagitan ng weightlifter na si Hidilyn Diaz, kasama pa ang dalawang pilak at isang tanso mula kina Petecio, Paalam, at Marcial.
Sa ranggo ng International Golf Federation, pumwesto si Pagdanganan sa 35th at si Ardina sa 55th, sapat upang mapasama sa 60 golfers na maglalaro sa French capital.
Sina Sanchez at Hatch ay inirekomenda ng Philippine Aquatics, Inc. bilang mga tatanggap ng universality places mula sa World Aquatics at lalaban sa women’s 100m freestyle at 100m butterfly.
Kung maaprubahan ang kahilingan ng bansa para sa karagdagang events, magkakaroon pa ng extra action si Sanchez sa 100m backstroke at si Hatch sa 100m freestyle.
Sa kabilang banda, si Watanabe ay makikipaglaban sa kanyang ikalawang sunod na Olympics sa women’s -63 kilogram section.