EN
— Nakakagulat na balita: kalahati lang ng mga nagtapos sa Technical and Vocational Education and Training (TVET) ang nagpatuloy para makuha ang National Certificate (NC) mula sa TESDA noong 2023.
Sa ginanap na budget hearing ng TESDA sa Senado, tinanong ni Sen. Sherwin Gatchalian kung bakit 52% lang ng mga TVET grads ang sumailalim sa competency assessment para makuha ang NC, na isang mahalagang dokumento na nagpapatunay ng kanilang kakayahan ayon sa industry standards. Ito rin ang nagbibigay ng dagdag sa tsansa ng mga graduates na makahanap ng trabaho.
“Noong 2022, nasa 64.3% ng mga graduates ang nag-NC, pero bumagsak ito sa 52.96% noong 2023. Ang target sana ng TESDA ay 70%," paliwanag ni Gatchalian.
Ayon kay TESDA Secretary Kiko Benitez, maraming factors ang tinitingnan sa pagbaba ng bilang, kabilang ang kakulangan ng mga assessors. Sa kasalukuyan, may 7,832 assessors lang sa buong bansa, pero target ng TESDA na ma-assess ang 6.2 milyong enrollees pagsapit ng 2025.
"Sa ilang sektor, gaya ng chemicals/plastics, footwear, at pyrotechnics, kulang talaga ng assessors," sabi ni Benitez.
Isa pa sa mga posibleng dahilan ay ang attitude ng mga estudyante. Ayon kay Benitez, maaaring hindi na raw kailangan ng ilan ang NC para sa promotion o paglipat ng trabaho. “Kung ang graduate ay magnenegosyo, baka feeling nila okay na ang training at hindi na nila kailangang kumuha ng cert,” dagdag pa niya, pero nilinaw niyang kailangan pang ma-validate ito.
Subalit, para kay Sen. Joel Villanueva, dating TESDA secretary, mahalaga pa rin ang NC para mapanatili ang standard ng mga graduates.
“May role ang NC sa pagsigurong may minimum level of competency ang bawat graduate,” diin ni Villanueva.
Mahalagang masagot ng TESDA ang tanong kung bakit maraming TechVoc grads ang hindi na kinukuha ang certification at paano maipupunan ang kakulangan sa assessors para masigurong ang lahat ng graduates ay may sapat na kakayahan sa kanilang mga napiling larangan.