EN
— Matinding ulan at hangin ang dala ni Severe Tropical Storm Kristine (Trami) habang patuloy itong nananalasa sa ilang bahagi ng Hilagang Luzon ngayong Huwebes, Oktubre 24. Ayon sa pinakabagong advisory ng PAGASA, nasa signal no. 3 pa rin ang ilang probinsya, na naghahanda sa epekto ng bagyo.
Kanina, 7 a.m., namataan ang mata ng bagyo malapit sa Aguinaldo, Ifugao, na may hangin na umaabot hanggang 730 kilometro mula sa gitna. Bumilis na rin ito, kumikilos na pahilagang-kanluran sa bilis na 20 km kada oras. Taglay nito ang lakas ng hangin na 95 km/h, at may pagbugsong umaabot hanggang 160 km/h.
Mga Lugar na Apektado
Patuloy na nararamdaman ang bagyo sa Hilagang Luzon, at posibleng magtagal pa ng mga 18 oras. Mga lugar tulad ng Cagayan (Southern part), Ifugao, Benguet, Nueva Vizcaya, at La Union ay nakararanas ng matinding hangin.
Samantala, ang mga probinsya na nasa ilalim ng signal no. 2 tulad ng Ilocos Norte, Apayao, at bahagi ng Metro Manila ay makakaranas ng mas banayad na banta, ngunit dapat pa ring maghanda sa mga epekto nito.
Mga lugar sa Visayas at iba pang bahagi ng Luzon, kabilang ang MIMAROPA at Bicol Region, ay apektado ng malalakas na bugso ng hangin dahil sa kombinasyon ng Northeasterly wind at bagyong Kristine. Ang mga malalayong isla at bundok, lalo na ang nasa hilagang bahagi ng bansa, ay posibleng makaranas ng mas malalakas na hangin.
Patuloy na Paggalaw
Inaasahang tatawid pa si Kristine sa Hilagang Luzon ngayong hapon bago ito lumabas ng Philippine Area of Responsibility (PAR) sa Biyernes, Oktubre 25. Habang tumatawid sa lupa, posible itong humina, pero maaaring lumakas muli pagdating sa West Philippine Sea.
Samantala, ang isang Low-Pressure Area (LPA) sa labas ng PAR ay maaaring maging tropical depression sa loob ng 24 oras, ayon sa PAGASA.
Mahalaga ang patuloy na pag-monitor sa lagay ng panahon upang maiwasan ang anumang sakuna at matiyak ang kaligtasan ng lahat.
READ: Bagyong Kristine Palakas, Nakatakdang Tumama sa Hilagang Luzon