EN
– Muling ipinakita ni Lydia Ko ang kanyang kahanga-hangang porma nang makuha niya ang limang stroke na panalo sa Kroger Queen City Championship noong Linggo (Lunes sa Manila). Sinurpresa ni Ko ang three-day leader na si Jeeno Thitikul sa pamamagitan ng isang kamangha-manghang back-nine rally sa TPC River's Bend, Maineville, Ohio.
“Parang panaginip lang,” sabi ni Ko matapos niyang tapusin ang laro ng birdie sa par-5 18th hole para sa final round na 63, na may kabuuang 23-under 265. Ang mainit niyang anim na birdies sa huling siyam na butas, kasama ang isang eagle, ang nagpabilib sa lahat ng nanonood.
Ito na ang ikatlong tagumpay ni Ko sa LPGA ngayong season—matapos siyang magwagi sa AIG Women’s Open noong Agosto at sa Hilton Grand Vacations Tournament noong Enero. Galing din siya sa gold medal finish sa Paris Olympics.
Nasa likod ng dalawang stroke si Ko kay Thitikul pagkatapos ng 54 holes, pero ang final round niya ay puro tumpak at diskarte. Nakakuha siya ng tatlong birdies sa front nine, bago nagsimula ang unstoppable na birdie-eagle combo sa back nine, kasunod pa ang tatlong birdies para malayo sa mga kalaban.
Si Thitikul ay lumamang pa ng isa sa unang bahagi ng laro, kasama ang isang eagle sa par-5 eighth, pero bumagsak ito nang mag-bogey sa sumunod na hole. Sa huling siyam, bumagsak ang laro niya sa tatlong bogeys, na kinansela ang tatlong birdies niya para matapos ang laro na 70 at kabuuang 270.
Samantala, ang reigning US Women’s Open champion na si Yuka Saso, mula sa ICTSI, ay nagtapos sa ika-apat na pwesto matapos maglaro ng 65, na may total na 272. Isang stroke lamang ang agwat niya sa third-place finisher na si Haeran Ryu (67).
Mabilis ang simula ni Saso, na nag-6 under sa unang walong butas at may eagle sa No. 8. Pero ang double bogey sa ika-9 na butas ay bahagyang nagpahina sa tsansa niyang maging kampeon. Pero, bumawi siya sa huling walong butas na may tatlong birdies para isara ang laro sa 65.
Samantala, si Bianca Pagdanganan, na nasa magandang posisyon pagkatapos ng tatlong sunod na rounds (68, 68, 69), ay nahirapan sa final round na 75, na bumagsak siya sa 32nd place na may total na 280. Tatlong bogeys sa 12th, 14th, at 17th holes ang nagpa-lugmok sa kanya.