EN
— Mahigit P32.76 milyong halaga ng mga illegal na vape products ang nakumpiska ng gobyerno sa nakalipas na 15 buwan, ayon sa ulat ng Department of Trade and Industry (DTI) kahapon.
Sa isang pahayag, sinabi ng DTI na mula Pebrero 2023 hanggang Mayo 2024, nakapag-isyu sila ng 526 show-cause orders at 284 notices of violation matapos suriin ang 89,046 pisikal at online na negosyo ng Fair Trade Enforcement Bureau.
Sa ilalim ng Republic Act 11900 o vape law, may pangunahing hurisdiksyon ang DTI sa regulasyon ng mga vape at iba pang bagong produktong tabako.
Iba pang mga ahensya tulad ng Department of Health, Food and Drug Administration, Department of Social Welfare and Development, Department of Education, Bureau of Internal Revenue, at mga local government unit ay may komplementaryong mga papel.
Ang vape law ay nagbabawal sa pagbebenta at promosyon ng mga vape products sa loob ng 100 metro mula sa mga lugar na madalas puntahan ng mga menor de edad.
“Ang pagma-market at pagbebenta ng mga vape products sa mga menor de edad ay tahasang ipinagbabawal sa ilalim ng vape law. Ngunit may matibay na ebidensya na ang mga manlalaro sa industriya ng vape ay gumagamit ng mga marketing strategies na naka-target sa mga kabataan – na nananatiling mas madaling maimpluwensyahan,” ani ni DTI Secretary Alfredo Pascual.
Sinabi ni Agaton Uvero, supervising head ng DTI Fair Trade Group, na ang ahensya ay nakatuon sa pagtitiyak na susunod ang mga manufacturers, importers, distributors, at retailers ng vape products sa batas.
Upang tugunan ang problema ng youth vaping, nakipagsanib-puwersa ang DTI sa mga advocacy groups tulad ng Health Justice Philippines, Social Watch Philippines, Philippine Legislators’ Committee on Population and Development, Child Rights Network, at ang Campaign for Tobacco-Free Kids.
Pinalalakas din ng DTI ang pagpapatupad at enforcement mechanisms ng vape law.
Hinihikayat ang publiko na i-report ang mga lumalabag sa vape law sa pamamagitan ng consumer care hotline ng DTI sa (1-384) o sa email na [email protected].