EN
— Isang makasaysayang kasunduan ang pinirmahan ng Pilipinas at Japan noong Lunes, na magpapahintulot sa mga militar ng dalawang bansa na magtulungan at magdeploy sa isa’t-isa sa gitna ng lumalalang tensyon sa rehiyon dahil sa agresibong kilos ng Tsina.
Sa ilalim ng Reciprocal Access Agreement (RAA) na sinimulang pag-usapan noong Nobyembre, inaasahang lalakas ang defense cooperation ng dalawang matagal nang kaalyado ng Estados Unidos, na may layuning harapin ang anumang banta mula sa Tsina.
Pinangunahan ni Defense Secretary Gilberto Teodoro Jr. at Japanese Foreign Minister Kamikawa Yoko ang pirmahan sa isang seremonya na dinaluhan ni Pangulong Ferdinand “Bongbong” Marcos Jr. sa Malacañang.
Ang RAA ay magbibigay ng legal na balangkas para sa pagpapadala ng mga defense personnel ng Pilipinas at Japan sa teritoryo ng isa’t-isa para sa mga joint exercises at iba pang operasyon, gaya ng koordinadong maritime patrols.
Kapag naipatupad na, magbibigay-daan ito sa Japan na maging full member sa taunang Balikatan military exercise na ginagawa ng Pilipinas at Estados Unidos, kung saan dati'y observer lamang ang mga tropa ng Japan.
Ang kasunduan na ito ang unang defense pact ng Japan sa Asia, matapos magkasundo sa katulad na kasunduan ang Australia noong 2022 at Britain noong 2023.
Dumating sa Manila sina Kamikawa at Japanese Defense Minister Minoru Kihara para dumalo sa "2+2" meeting kasama sina Teodoro at Foreign Affairs Secretary Enrique Manalo. Ayon sa Presidential Communications Office, ito ang "pinakamataas na mekanismo para sa konsultasyon upang palalimin pa ang security at defense policy coordination at security cooperation ng dalawang bansa."
Noong Abril, nagkita si Marcos kasama ang mga lider ng Japan at Estados Unidos para sa isang makasaysayang trilateral summit na naglalayong palakasin ang ugnayang pang-ekonomiya at pang-seguridad. Inilarawan ito ng Department of Foreign Affairs bilang isang “admirable aspiration na hindi dapat ituring na banta ng anumang bansang nagmamahal sa kapayapaan.”
Patuloy na inaangkin ng Tsina ang halos buong South China Sea, habang ang Pilipinas at iba pang bansa sa Timog-Silangang Asya ay may kani-kaniyang mga overlapping claims dito.
Binalewala ng Beijing ang desisyon ng isang international tribunal noong 2016 na nagsasabing walang legal na basehan ang kanilang mga pag-aangkin.
Sa mga nakaraang taon, lumalakas ang boses ng Pilipinas laban sa mapanganib na pag-uugali ng Tsina, kabilang ang pagbomba ng water cannon at pagbangga sa mga bangka ng Pilipinas para hadlangan ang resupply missions sa BRP Sierra Madre, isang World War II ship na nagsisilbing outpost ng Philippine Navy sa Ayungin Shoal.
Kamakailan lang, nagkasundo ang Pilipinas at Tsina na bawasan ang tensyon sa West Philippine Sea matapos ang isa sa pinakamatinding engkwentro kung saan nasugatan ang isang Pilipinong tripulante habang tinatangkang pigilan ang isang Chinese vessel sa pagbanga sa kanilang bangka.