EN
— Sa patuloy na init ng UAAP Season 87 Finals, umarangkada ang University of the Philippines (UP) Fighting Maroons matapos ang kanilang 73-65 na panalo kontra De La Salle Green Archers nitong Linggo sa Smart Araneta Coliseum. Sa kabila ng agresibong simula ng defending champs, dinaig sila ng matibay na depensa at diskarte ng Maroons.
Si Quentin Millora-Brown ang naging pader ng UP sa paint, nagtala ng 17 puntos, siyam na rebounds, at highlight plays sa crucial moments. Bukod sa kanya, nagpasiklab rin sina Francis Lopez na may 13 puntos, anim na rebounds, at apat na block, kasama si JD Cagulangan na umiskor din ng 13.
Bagamat lamang ang La Salle, 41-37, sa halftime — nangunguna si Kevin Quiambao na may 18 puntos noon — nagbago ang ihip ng hangin nang mag-init ang depensa ng Diliman-based squad. Sinimulan nila ang ikatlong quarter sa 8-0 run para makuha ang abante, 45-41.
Pilit Bumawi ang Green Archers
Pansamantalang bumawi sina CJ Austria at Mike Phillips, ngunit hindi na nagpatinag ang Maroons. Isang matinding 18-7 run ang nagpalayo sa UP, 63-52, sa huling bahagi ng laban. Kahit nakapagsagawa ng 7-0 rally ang La Salle, tinapos ito ng clutch na tres ni Gerry Abadiano, na naglagay sa Maroons ng mas komportableng 70-63 lead sa huling 40 segundo.
“Lahat kami, committed sa depensa. Kaya kahit hirap, solid ang focus,” ani Millora-Brown matapos ang laro.
Samantala, nabawasan ang kinang ni Quiambao sa second half, nagtapos na may 19 puntos at 11 rebounds pero 6 na turnovers. Hindi rin naging sapat ang double-double ni Phillips na 17 puntos at 11 rebounds para maitanghal muli ang La Salle.
Abangan ang Game 2
Susubukang tapusin ng UP ang serye at kunin ang kanilang ikalawang titulo sa apat na season ngayong Miyerkules sa Mall of Asia Arena, alas-5:30 ng hapon. Ang tanong: babangon ba ang La Salle tulad ng ginawa nila noong nakaraang season, o tapos na ang kanilang championship reign?
READ: UP Maroons Show Heart in Game 1 Win Over La Salle