EN
— Inaprubahan ng Regional Tripartite Wages and Productivity Board ang P35 dagdag sa arawang minimum na sahod ng mga manggagawa sa National Capital Region (NCR).
Ayon sa bagong utos ng National Wages and Productivity Commission (NWPC), tataas ang minimum na sahod sa P645 para sa mga non-agriculture workers mula sa dating P610.
Sinabi ng Department of Labor and Employment (DOLE) na magiging epektibo ang bagong sahod sa Hunyo 17, labinglimang araw matapos itong mailathala sa pahayagan na may malawakang sirkulasyon.
Huling tumaas ang minimum wage sa Metro Manila noong Hulyo 16, 2023, na naging P610 para sa sektor na hindi pang-agrikultura at P573 para sa agrikultura.
Ayon sa DOLE, mahigit 988,243 na minimum wage earners sa NCR ang direktang makikinabang sa wage order na ito.
“Humigit-kumulang 1.7 milyong manggagawa na kumikita ng higit sa minimum wage ang posibleng makinabang din dahil sa mga adjustments na dulot ng pagwawasto ng wage distortion,” sabi ng DOLE.
Ang dagdag sahod ay katumbas ng 5.7 porsyento mula sa kasalukuyang daily minimum wage sa Metro Manila.
Ito ay katumbas din ng limang porsyentong pagtaas sa mga benepisyo na may kaugnayan sa sahod, kabilang ang 13th month pay, service incentive leave, at mga social security benefits gaya ng SSS, PhilHealth, at Pag-IBIG.
Sinabi ng Employers Confederation of the Philippines (ECOP) na susunod ito sa inaprubahang daily minimum wage para sa mga manggagawa sa NCR.
“Hihikayatin namin ang aming mga miyembro na ipatupad ang pagtaas ng sahod,” sabi ni ECOP president Sergio Ortiz Luis Jr.
Insulto sa Manggagawa
Tinawag ni Gabriela party-list Rep. Arlene Brosas na “insulto” ang P35 wage adjustment.
“Ang P35 dagdag sahod ay napakababa at hindi sapat para tugunan ang malalang kalagayang pang-ekonomiya ng mga manggagawang Pilipino at kanilang mga pamilya,” sabi ni Brosas.
“Paano makaka-survive ang mga manggagawa sa Metro Manila sa P645 kada araw kung ang family living wage ay P1,200 at patuloy na tumataas ang presyo ng mga bilihin?” tanong ni Brosas.
Isinusulong ni Brosas ang pagpasa ng House Bill 7568, na naglalayong magbigay ng across-the-board wage adjustment na P750.
Nagalit din si Kilusang Magbubukid ng Pilipinas secretary general Jerome Adonis sa mas mababang P35 wage hike kumpara sa P40 noong nakaraang taon.
Kinuwestyon din ng labor group ang hakbang ni Marcos na itaas ang sahod sa pamamagitan ng mga regional wage boards sa halip na hikayatin ang House of Representatives na magpasa ng batas para sa nationwide salary increase.
Hinimok ni Adonis ang mga manggagawa na magprotesta sa State of the Nation Address (SONA) ni Pangulong Marcos sa Hulyo 22.
Ayon kay Renato Reyes, presidente ng Bagong Alyansang Makabayan, ang anunsyo ng daily minimum wage increase ay upang pabanguhin ang administrasyon ni Marcos sa publiko.
“Pampapogi lang sa SONA ni Marcos ang kakarampot na wage hike,” sabi ni Reyes.
Idinagdag pa ni Reyes na hindi pa rin sapat ang P645 para makahabol sa tumataas na presyo ng mga pangunahing bilihin.