EN
Tiyak nang makakasama sa delegasyon ang mga hurdlers na sina John Cabang Tolentino at Lauren Hoffman. At kung magtutugma ang mga bituin, posibleng makasama rin sa team ang sprinter na si Kristina Knott at isa pang hurdler na si Eric Cray.
"John Cabang Tolentino, sigurado na 'yan," ani Philippine Athletics Track and Field Association secretary-general Jasper Tanhueco kahapon sa The STAR.
"Si Lauren Hoffman, base sa puntos, walang makakahabol sa kanya. Kailangan pa ng apat na atleta para maungusan si Lauren. Pero napaka-improbable, kaya ligtas siya," dagdag pa ni Tanhueco.
Si Tolentino na nakabase sa Espanya ay nasa top 40 sa No. 29 sa men's 110-meter hurdles habang si Hoffman naman ay nasa No. 36, ligtas din sa loob ng top 40 sa women's 400m hurdles.
Ipapahayag ng World Athletics ang lahat ng mga qualifier para sa Olympics sa Hulyo 7.
Kasama na sa naunang napili para sa Team Pilipinas ang pole-vaulter na si EJ Obiena, mga bokser na sina Nesthy Petecio, Carlo Paalam, Eumir Marcial, Aira Villegas, at Hergie Bacyadan, mga gymnast na sina Carlos Yulo, Aleah Finnegan, Levi Ruivivar, at Emma Malabuyo, mga weightlifter na sina Vanessa Sarno, Elreen Ando, at John Ceniza, rower na si Joanie Delgaco, fencer na si Sam Catantan, judoka na si Kiyomi Watanabe, mga golfers na sina Bianca Pagdanganan at Dottie Ardina, at mga swimmer na sina Kayla Sanchez at Jarod Hatch.