EN
— Ayon sa Department of Agriculture (DA), ang pagpasok ng mga bagong alagang hayop ang nagdulot ng unang kumpirmadong kaso ng Q fever sa bansa, ayon sa ulat na isinumite sa World Organization for Animal Health noong Hulyo 1.
Nagsimula ang lahat nang iulat ng DA na ang ilang Anglo-Nubian goats na inimport ng Bureau of Animal Industry (BAI) mula sa Estados Unidos ay nagpositibo sa naturang sakit.
"Sabi sa report, nagsimula ang 'event' noong nakita ang mga clinical signs sa ilan sa mga imported na kambing," dagdag pa nito, na nagsimula ang Q fever infection noong Pebrero 13.
Noong Hunyo 19, nagsagawa ng confirmatory testing ang DA-BAI sa Philippine Carabao Center-Biosafety and Environment Laboratory sa Science City of Muñoz, Nueva Ecija.
Ayon sa DA, pinatay nila ang 91 ulo ng kambing at baka sa Barangay Napo sa Santa Cruz, Marinduque upang mapigilan ang pagkalat ng Q fever.
Sa mga pinatay na hayop, 84 ang kambing habang ang iba ay baka.
Nasa ulat din na 19 kambing ang nagpositibo at tatlo ang namatay dahil sa sakit.
Sinabi ng gobyerno na nagsagawa sila ng disinfection, movement control, quarantine, screening at disposal ng mga bangkay, by-products at waste pati na rin ang stamping out programs sa apektadong barangay.
Patuloy ang surveillance sa loob at labas ng restricted zone ng outbreak, ayon sa DA.
Isang tagapagsalita ng US Department of Agriculture ang nagsabi sa The STAR na malusog ang mga kambing nang dumating sa Pilipinas.
Dagdag pa ng opisyal, ang mga karagdagang Q fever tests na ginawa ng BAI noong Abril 3 kung saan nagpositibo ang ilang hayop ay lagpas na sa incubation period ng sakit.
"Ang incubation period ng Q fever ay mula 2 hanggang 48 days. Ang mga hayop ay nasa Pilipinas na ng 81 days bago pa ang testing," sabi ng tagapagsalita.