EN
—Buhay pa ang playoff hopes ng Choco Mucho sa PVL Reinforced Conference matapos nilang mapasakamay ang mahalagang panalo kontra Chery Tiggo, 25-16, 25-11, 23-25, 19-25, 15-12, nitong Martes sa PhilSports Arena.
Naghahanap ng panibagong sigla matapos ang dalawang sunod na pagkatalo, kumapit ang Flying Titans kay Me-an Mendrez na naghatid ng 18 puntos mula sa 14 atake, dalawang block, at dalawang ace.
“Sobrang saya ko sa naging laro namin, kailangan talaga namin ito. Salamat na rin sa effort ng buong team kahit mahirap,” sabi ni coach Dante Alinsunurin. “Hindi madali, pero trinabaho talaga ng Chery Tiggo.”
“Sobrang nakaka-overwhelm na pagkatiwalaan ako ng coaches at teammates, ramdam na ramdam ko yung support nila,” ani Mendrez.
Patuloy namang bumida si Dindin Santiago-Manabat na nag-ambag ng 17 puntos habang si Maddie Madayag ay nakapuntos ng 11, kasama ang apat na blocks mula sa kabuuang 13 blocks ng Choco Mucho.
Nag-ambag din ang Greek import na si Zoi Faki ng 10 puntos mula sa anim na atake, tatlong block, at isang ace, dagdag pa ang siyam na excellent digs at walong excellent receptions. Si Deanna Wong naman ay nakapagtala ng 19 excellent sets.
“Mas lalo itong naging special kasi nanalo kami in five sets. Isang malaking pagsubok ito para sa amin lalo na't natalo kami ng dalawang five-set matches sa unang round,” ani Faki.
Sa kabila ng matinding laban mula sa Chery Tiggo, na dominado ang third at fourth sets, bumangon ang Choco Mucho at humataw ng 12-5 sa fifth set, sa tulong nina Mendrez at Madayag. Tinangkang habulin ng Crossovers ang lamang sa pamumuno nina Pauline Gaston at Khat Bell, pero hindi nagpatinag sina Mendrez at Santiago-Manabat.
Si Bell ang nanguna sa scoring para sa Chery Tiggo na may 25 puntos, karamihan mula sa attacks, ngunit kinapos pa rin ang koponan na ngayon ay may 4-2 record. Nagdagdag naman si Gaston ng 13 puntos, limang blocks, at si Ara Galang ay nagambag ng 10 puntos. Si Mary Rhose Dapol ay may walong puntos at 11 excellent digs, habang si Jasmine Nabor ay may 20 excellent sets.