EN
— Muling pumasok si Typhoon Julian sa Philippine Area of Responsibility (PAR) kahapon, ayon sa Philippine Atmospheric, Geophysical and Astronomical Services Administration (PAGASA). Bagamat ito’y pumasok na, tiniyak ng ahensya na hindi na ito magkakaroon ng direktang epekto sa bansa.
Sinasabing si Julian ay nag-landfall at nagsimula nang tumawid sa Taiwan noong nakaraang araw. Sa pinakahuling monitoring, ito’y nakitang 255 kilometro hilagang-kanluran ng Itbayat na may maximum sustained winds na 120 km/h at may gustiness na umaabot sa 200 km/h. Inaasahan na magiging remnant low na ito sa Taiwan sa araw na ito.
Dahil sa kanyang presensya, magkakaroon ng mga nakakalat na pag-ulan sa Batanes at Babuyan Islands. Ang trough ni Julian ay magdadala rin ng ulan sa Ilocos region, Apayao, Abra, Kalinga, at mainland Cagayan. Sa Central Luzon, pati na sa natitirang bahagi ng Cordillera Administrative Region (CAR) at Cagayan Valley, asahan ang mga isolated na pag-ulan dulot ng localized thunderstorms. Samantalang ang Metro Manila at iba pang bahagi ng bansa ay maaring makaranas ng isolated rains mula sa easterlies.
Nauna nang nagdulot ng malawakang pagbaha at landslides si Typhoon Julian sa hilagang Luzon, kung saan naiulat ang pagkamatay ng dalawa, walong nasugatan, at isang nawawala, batay sa ulat ng National Disaster Risk Reduction and Management Council (NDRRMC). Ang mga biktima ay mula sa Ilocos region at CAR. Ang walong sugatan at ang isang nawawala ay mula rin sa mga nabanggit na lugar.
Ayon sa NDRRMC, umabot sa 58,953 na pamilya o mahigit 211,000 na tao ang naapektuhan sa Ilocos, CAR, at Cagayan Valley. Sa mga ito, 308 na pamilya o 922 tao ang kasalukuyang nasa 26 evacuation centers sa mga apektadong probinsya, kung saan ang kanilang pangunahing pangangailangan ay patuloy na sinusuportahan.
Samantala, iniulat ng Department of Agriculture (DA) na umabot sa P481.27 milyon ang pinsala sa sektor ng agrikultura dahil kay Typhoon Julian. Ang nasabing pinsala ay nagmula sa rice, corn, high-value crops, livestock, poultry, at mga irrigation facilities na nakaapekto sa 20,134 na magsasaka, na sumasaklaw sa 13,488 ektarya ng mga sakahan at may kabuuang pagkalugi sa produksyon na 19,151 metric tons.
READ: Typhoon Julian Humina, Pero Patuloy na Apektado ang Hilagang Luzon