EN
— Bumida ang Strong Group-Pilipinas at patuloy na pinapakita ang kanilang lakas sa William Jones Cup, kung saan pinadapa nila ang koponang Malaysia, 89-54, Miyerkules ng gabi.
Si Chris McCullough ang naging sandigan ng opensa ng Pilipinas, nagpakitang-gilas ng 16 puntos at limang rebounds. Sumabay naman si Rhenz Abando na may 14 puntos.
Bagaman nagkaroon ng malaking kalamangan sa unang dalawang quarters, humina ang laro ng Pilipinas at pumasok sa halftime na apat na puntos lamang ang lamang, 40-36.
Nag-iba ang ihip ng hangin sa third quarter nang maagaw ng Malaysia ang kalamangan, 47-46, sa natitirang limang minuto, matapos ang dalawang free throws ni John Wesley Murry II.
Nagising ang SGA at nagsimula ng 13-1 run na tinapos ng isang three-pointer ni Abando, upang lumamang ng 11 puntos, 59-48, sa natitirang 1:31 ng quarter.
Nagpatuloy ang momentum ng Pilipinas sa huling quarter, nagsimula sa isang 16-2 run na tinapos ng isang lefty floater ni Dave Ildefonso.
Bagaman nakasagot ng isang dunk si Joseph Obasa, hindi na ito sapat upang bumawi para sa Malaysia.
Dinominahan ng SGA ang Malaysia, 30-6, sa huling quarter upang makuha ang panalo.
Nagtala si Murray ng 25 puntos, pitong rebounds at tatlong assists.
Si Obasa, na naglaro para sa Ateneo Blue Eagles noong kolehiyo, ay nagtapos na may 13 puntos at anim na rebounds.
Nag-ambag din sina Tajuan Agee, Ange Kouame at Derrick Fenner Jr. ng 12, 11, at 10 puntos, ayon sa pagkakasunod para sa koponan ng Pilipinas.
Sa kanilang panalo, ang SGA ay 4-0 na sa torneo.
Susunod nilang haharapin ang koponan ng USA sa Huwebes, alas-1 ng hapon.
