EN
— Maagang nalugi ang Pilipinas para sa darating na Southeast Asian Games sa Bangkok, Chonburi, at Songkhla, Thailand, matapos desisyonan ng host country na tanggalin ang ilang sports na pinagmumulan ng mga gintong medalya para sa mga Pinoy.
Isa sa mga tinanggal na disiplinang weightlifting, na nagbigay sa bansa ng kauna-unahang Olympic gold medal noong Tokyo Games salamat kay Hidilyn Diaz.
Kasama rin sa naalis sa kalendaryo ang wushu, jiu-jitsu, at karate, na dati nang naghatid ng mga tagumpay.
Ayon kay Abraham Tolentino, pangulo ng Philippine Olympic Committee, ang hakbang na ito ay maaaring magbawas ng walong ginto para sa Pilipinas.
"Nagsumite na kami ng apela sa mga Thai host para isama ulit ang weightlifting, wushu, jiu-jitsu, at karate," sabi ni Tolentino, na dumalo sa SEA Games Federation meeting sa Bangkok nitong weekend.
"Hindi lang ang Pilipinas ang nag-apela, kundi karamihan ng mga miyembro ng (SEA) Games," dagdag pa niya.
Sa huling edisyon ng SEA Games sa Phnom Penh, Cambodia, humakot ng mga ginto ang bansa mula sa mga nasabing disiplina sa pamamagitan nina Kaila Napolis, Annie Ramirez, at Marc Lim sa jiu-jitsu; Agatha Wong sa wushu; Jamie Lim at Sakura Alforte sa karate; at Elreen Ando at Vanessa Sarno sa weightlifting.
Kaya't todo kayod ang POC para kumbinsihin ang mga Thai na magbago ng isip.
"Mawawalan tayo ng maraming gintong medalya kung hindi papasa ang apela," pahayag ni Tolentino.