Tagalog
Sa pangunguna ng Department of Environment and Natural Resources (DENR), pormal nang sinimulan ang imbestigasyon sa umano'y hindi maayos na pagtrato sa dalawang tarsier ng ilang vloggers.
"Sa abiso na ito, ibinabalita ng DENR-12 monitoring at enforcement team na nakatanggap sila ng ulat noong Lunes, ika-8 ng Abril, hinggil sa nakababahalang video ng hindi tamang pagtrato sa mga Philippine Tarsiers. Ang naturang video ay inilathala sa social media ng isang vlogger na kilala bilang 'Farm Boy' mula sa Polomolok, South Cotabato," ayon sa pahayag ng DENR.
"Ang Kagawaran ay nagpasiya nang simulan ang imbestigasyon ukol sa nasabing isyu at napag-alaman na ang dalawang tarsier na tampok sa video ay pinalaya sa kalikasan ng vlogger. Gayunpaman, patuloy pa rin ang paghahanap ng ahensiya ng karagdagang aksyon na dapat gawin hinggil sa insidente sa mga hayop," dagdag pa nito.
Sa video ng vlogger, makikita na isang lalaki ang mahigpit na hawak ang hayop habang tumatawa at naglalaro dito.
Nakunan din sa video ang kanyang kasamahan na kumuha ng isa pang tarsier mula sa puno at hiningan ito ng ngiti.
Sa isang pahayag, kinondena ng Philippine Tarsier Foundation ang aktong ito at nanawagan sa publiko na huwag suportahan ang mga account na nag-post muli ng video. Hinihikayat din nila ang publiko na i-report ang insidente.
"Huwag nating suportahan ang 'animal harassment' at ang mga account na umaasa dito para sa atensyon. Dapat bigyan ng leksyon ang mga ganitong account," ang pahayag ng foundation sa kanilang Facebook post.
Isa ang Philippine Tarsier sa mga katutubong at pambihirang uri ng hayop sa bansa, ayon sa DENR.
Base sa ilang pag-aaral, naitala na ang mga Tarsier ay maaring manakit sa kanilang sarili kapag sila ay nasa stressful na kalagayan o nakakulong.
