Tagalog
Ang torneo ay hahatiin sa tatlong kategorya para sa parehong lalaki at babae na may edad 17 pababa. Isa rin itong fundraising event para sa mga Aeta sa Pampanga at Zambales.
May special category din para sa mga elite swimmers sa 50-meter freestyle, kung saan P5,000 ang mapapanalunan ng gold medalist sa winner-take-all battle royale.
“Marami ang gustong sumali, pero nilimitahan namin sa 450 para mapabilis ang kompetisyon. Bukod sa paglinang ng mga batang manlalangoy, ang event na ito ay fundraising din,” sabi ni Perpetual Help coach Darren Evangelista, na siyang nangunguna sa GoldenEast ads promo and events, ang organizer ng torneo.
Ayon kay tournament director Jojo Manaloto, masaya silang makatulong sa pag-angat ng kalagayan ng mga Aeta. "Bukod sa pagpapalaganap ng swimming, natutulungan din natin ang ating mga kapatid na Aeta. Kailangan nila ng alaga at suporta para malampasan ang kahirapan," pahayag ni Manaloto, na coach din ng Emilio Aguinaldo College-Cavite.
Ibinahagi ni Manaloto na tinuruan niya ang mga Aeta kung paano lumangoy at karamihan sa kanila ay nasa ibang bansa na at nagtatrabaho bilang lifeguards. Samantala, sinabi ni Evangelista na nakipag-usap na siya kay Philippine Sports Commission commissioner Fritz Gaston para sa posibleng pagpapalawak ng kanilang indigenous peoples program.
