EN
— Alugbati, o Malabar spinach sa English, ay isang masustansyang gulay na madalas makita sa palengke. Hindi ito tunay na spinach, pero dahil sa hitsura at lasa, kadalasang naihahambing dito. Makapal ang mga dahon ng alugbati, madilim na berde, at minsan may pulang linya sa gilid ng dahon at tangkay.
Siksik ito sa nutrients—vitamins A, B1, B2, B3, B6, B9, C, calcium, iron, at potassium, pati na rin antioxidants na flavonoids at phenolic acids. Dahil dito, may mga health benefits itong dala, gaya ng pagtulong sa paghilom ng sugat, pag-iwas sa diabetes, at pagpapanatili ng malusog na kidney at atay.
Pero, kahit napakaraming benepisyo, marami pa rin ang nagdadalawang-isip na isama ito sa kanilang mga putahe dahil hindi nila alam paano ito lutuin. Kaya naman, ilang top Pinoy chefs ang nagbahagi ng kanilang paboritong paraan para ma-enjoy ang alugbati:
Chef Gino Gonzalez (Center for Asian Culinary Studies)
Para kay Chef Gino, isa sa mga simple pero masarap na paraan ng pagluto ng alugbati ay ginisa ito kasama ng bagoong at kaunting pork. Pwede rin daw lagyan ng chicharon bilang topping!
Chef Waya Araos-Wijangco (Gypsy Baguio)
Sa bahay nila Chef Waya, lagi raw nilalagay ang alugbati sa monggo. Paborito niya rin itong kainin bilang salad—blanched, tapos sinasawsaw sa bagoong, calamansi, at kamatis. Kamakailan, na-enjoy niya itong gawing ohitashi, ang Japanese salad na kadalasang gawa sa spinach.
Chef Christopher Guado Carangian (Zicreto & Culinary Generals of the Philippines)
Ginisang sardinas plus alugbati? Yes, please! Para kay Chef Christopher, isa ito sa mga pinaka-simple pero comforting na paraan ng pagluto. Madalas daw ito sa Central Luzon at Visayas, at paborito rin nilang gawing salad.
Chef Jam Melchor (Culinary Historians of the Philippines)
Alugbati omelette? Bagay na bagay! Si Chef Jam, iniincorporate ang mga sariwang alugbati leaves sa kanyang itlog kasama ang kamatis at konting keso para sa isang hearty breakfast. Plus, pwede ring gawing salad, haluan ng kamatis at sibuyas, at lagyan ng vinaigrette!
Chef Myke ‘Tatung’ Sarthou (Azadore, Lore, Tindeli)
Kay Chef Myke, ang alugbati ay classic na panghalo sa monggo o sinigang. Ginagawa niya rin itong ginisa—simple lang, pero panalong panalo!
Kaya sa susunod na makakita ka ng alugbati sa palengke, huwag nang magdalawang-isip—gawin itong salad, omelette, o igisa kasama ng paborito mong sangkap!
READ: Benepisyo ng Pipino at Okra sa Katawan