EN
—Ngayong tag-ulan, balik-eskwela na ang mga bata, kasabay ng mga sakit tulad ng dengue, flu, at leptospirosis. Sabi nga nila, "weather-weather lang," pero ang banta ng mga sakit na dulot ng ulan ay 'di biro. Kaya naman, muling isinusulong ang kahalagahan ng bakuna para sa kalusugan ng mga chikiting.
Kamakailan, sa ginanap na Regional Health Connect Media Forum ng Pharmaceutical and Healthcare Association of the Philippines (PHAP), naging pokus ang mga sakit na kumakalat tuwing tag-ulan—kilala bilang W.I.L.D. diseases: water-borne illnesses, influenza-like diseases, leptospirosis, at dengue. Ang mga eskwelahan, na puno ng mga bata, ay nagiging breeding ground ng mga sakit na ito. Sabi nga ng mga eksperto, mas mahalaga ngayon ang bakuna kaysa dati.
Ayon kay Dr. Benito Atienza, isa sa mga nangungunang eksperto sa kalusugan, ang bakuna ay unang depensa kontra sa mga sakit na madalas tamaan ng mga bata tuwing maulan. Pero nakakabahala, kasi sa probinsya ng Iloilo, mababa pa rin ang vaccination coverage—mga 38% lang ng target ang naabot, malayo sa 95% na goal ng DOH. Ang kulang na ito ay hindi lang naglalagay sa peligro sa kalusugan ng mga bata, kundi pati na rin sa kakayahan ng healthcare system na harapin ang mga outbreak.
Kailangan natin ng aksyon! Bukod sa pagsasabing libre ang mga bakuna sa mga public health centers, dapat ipaliwanag na safe at epektibo ang mga ito. Dr. Hector Santos, presidente ng Philippine Medical Association (PMA), ay nagsabi na walang mas mahalaga kaysa sa kaligtasan ng mga bata laban sa mga sakit na puwede namang maiwasan.
Bukod sa misinformation na nagpapakalat ng takot sa bakuna, marami pa ring magulang ang nag-aalinlangan. Nakakalimutan ng iba na ang mga vaccine ay proteksyon para hindi magkasakit ang kanilang mga anak—lalo na’t madalas ang ulan, at mahina ang resistensya ng bata. Ang simpleng ubo o lagnat ay maaaring maging malubha kung walang proteksyon mula sa bakuna.
Team Bakuna sa Lokal na Komunidad
Hindi rin kakayanin ng DOH mag-isa. Kailangang magtulungan ang mga LGUs, paaralan, at komunidad sa pagpapalaganap ng tama at sapat na impormasyon. Ang mga bakuna champions at health experts tulad nina Dr. Lulu Bravo at Dr. Rodney Labis ay nagbuhos ng kanilang oras para tiyaking handa ang vaccine supply sa bawat lugar. Anila, sayang ang pagkakataong magpabakuna kung wala naman daw supply ng bakuna.
Isang magandang hakbang ay ang pagbabalik ng school-based immunization programs. Ayon kay Dr. Jose Atienza, simula Oktubre, magsisimula na uli ang pagbabakuna ng mga Grade 1 at Grade 7 students. Siguraduhin daw ng mga magulang na bakunado ang kanilang mga anak, dahil libre at safe ito.
Aksyon Ngayon Para Sa Kinabukasan
Sabi nga ni Teodoro Padilla, Executive Director ng PHAP, "Ang bakuna ang isa sa mga pinaka-epektibong public health intervention." Malaki ang maitutulong nito para maiwasan ang mga sakit, mabawasan ang pag-absent ng mga bata sa eskwela, at mapanatili ang tuloy-tuloy na edukasyon.
Ngayong tag-ulan, huwag nating isugal ang kalusugan ng mga bata. Panahon na para itaguyod ang kaligtasan nila. Huwag magpatumpik-tumpik, magpabakuna na!