EN
— Isang grupo ng mga magulang, ang Parents Against Vape (PAV), ang humihiling ng mas mahigpit na regulasyon sa pagmemerkado at pagbebenta ng vape products upang tugunan ang tinatawag nilang "vapedemic."
Ayon sa PAV, kailangang amyendahan ang Vape Law at itigil ang promosyon ng mga produktong partikular na umaakit sa mga kabataan. "Hindi ligtas na alternatibo sa paninigarilyo ang vaping. Ito ay nagdadala ng malaking panganib sa kalusugan, lalo na sa mga lumalaking baga at utak ng ating mga anak," pahayag ng grupo.
Binanggit din nila ang mga kaso ng EVALI o e-cigarette or vaping use-associated lung injury bilang ebidensya na "nakamamatay ang vaping." Ipinanawagan din ng PAV ang pagbabawal sa flavored vapes at pagtitiyak na ang packaging ay hindi kaakit-akit sa mga menor de edad.
Batay sa ulat ng Department of Health, tumaas ng 110 porsyento ang bilang ng mga gumagamit ng vape noong 2023. "Lalong nakakabahala ang istatistikang isa sa bawat pitong kabataan, edad 13 hanggang 15, ay gumagamit ng vape products. Ito'y sa kabila ng Republic Act 11900 na nagsasabing tanging mga 18 taong gulang pataas lamang ang maaaring magkaroon ng access sa vape," dagdag pa ng PAV.
Iminungkahi ng grupo na itaas ang edad ng pag-access sa vape products mula 18 hanggang 21 taon at limitahan ang flavors sa menthol at tobacco lamang. "Kung ang vaping ay ipinakikilala bilang tulong sa pag-quit ng paninigarilyo, hindi na kailangan itong gawing kaakit-akit, lalo na sa ating mga anak," paliwanag ng PAV.
Hinikayat din ng PAV ang pagbabalik ng regulatory power sa Food and Drug Administration mula sa Department of Trade and Industry. "Kailangan ng masusing pagsusuri at regulasyon ng FDA upang masiguro ang kaligtasan ng publiko, lalo na ang mga kabataan," diin ng grupo.
Sa harap ng patuloy na pagtaas ng paggamit ng vape sa bansa, binigyang-diin ng PAV ang kahalagahan ng mas mahigpit na batas at regulasyon upang protektahan ang kalusugan ng mga kabataan. "Hindi sapat ang kasalukuyang batas. Kailangan natin ng konkretong aksyon at pagbabago sa polisiya upang mapigilan ang paglaganap ng vapedemic," pahayag nila.
Ang panawagan ng PAV ay isang hakbang tungo sa mas ligtas na kapaligiran para sa mga kabataan at pagsugpo sa patuloy na pagtaas ng vape users sa bansa. "Kailangan natin ng sama-samang pagkilos upang maprotektahan ang kinabukasan ng ating mga anak," pagtatapos ng grupo.