Tagalog
— Hindi nagpatinag si Devin Booker, na umiskor ng 40 puntos para pangunahan ang Phoenix Suns sa isang matinding come-from-behind na panalo laban sa LA Clippers, 125-119, nitong Biyernes sa Intuit Dome sa California. Matapos maiwan ng 21 puntos sa third quarter, gumawa ng paraan ang Suns para makabawi.
Nagtala si Booker ng 11-of-18 shooting at tumama ng 13 sa kanyang 15 free throw attempts. Dinagdagan niya pa ito ng walong assists, limang rebounds, at tatlong steals.
Lumamang nang 21 ang Clippers, 77-56, pagkatapos ng isang basket ni Ivica Zubac sa third quarter. Pero sa loob ng susunod na 10 minuto, lumaban ang Suns at naitabla ang score sa 91 matapos ang isang tip-in ni Mason Plumlee.
Naungusan pa ng Suns ang Clippers, 99-95, dahil sa back-to-back 3-pointers nina Ryan Dunn at Royce O’Neale. Ngunit saglit na nakabawi ang Clippers sa pamamagitan ng pitong sunod-sunod na puntos, kasama na ang tres ni Nic Batum para sa 102-99 lead.
Muling bumalik sa laban ang Suns sa tulong nina Booker, Dunn, at Tyus Jones para lumamang ng tatlo, 105-102, sa natitirang anim na minuto. Nagawa pang itabla ni Harden ang laro sa 105 matapos ang isang tres, pero hindi ito nagtagal—isang 10-2 run ng Suns ang naglagay sa kanila sa kontrol, 115-107, matapos ang layup ni O’Neale sa natitirang 2:42.
Tinangkang bumawi ni Harden para sa Clippers at nakuha niyang maibaba ang lamang sa tatlo, 112-115, pero nakahulog ng clutch na tres si O’Neale na naglagay sa laro sa 118-112 sa natitirang 44.3 segundo.
Si O'Neale ay nag-ambag din ng 21 puntos at pitong rebounds, habang si Kevin Durant ay mayroong 18 puntos at limang rebounds.
Nagtapos si Harden na may triple-double na 25 puntos, 13 assists, at 10 rebounds ngunit may anim na turnovers. Nagdagdag sina Norman Powell ng 23 puntos at si Zubac naman ng 22 para sa Clippers.
Ang Suns ay pumalo na sa 4-1 na kartada ngayong season, habang ang Clippers ay 2-3 at patuloy na walang panalo sa bagong Intuit Dome.
READ: Pacers Nagwagi sa Celtics sa OT; Cavs Tinalo ang Lakers sa James Family Return
