Tagalog
– Abala ang mga pambansang football teams ng Pilipinas ngayong papalapit ang pagtatapos ng taon, na may sunod-sunod na laban para sa Filipinas at sa men's squad ngayong darating na Oktubre at Nobyembre.
Sa darating na Oktubre, may FIFA window para sa women's team, at lalaro ang Filipinas sa isang invitational tournament sa Turkey. Makakaharap nila ang mga bansang tulad ng Jordan at Haiti—ito ang kanilang unang kompetisyon mula nang sumabak sa Pinatar Cup nitong taon.
"Sa Oktubre, during the [FIFA] window, pupunta tayo ng Turkey... Inimbitahan tayo at lalaro tayo laban sa Jordan, Haiti, at Mali... Although, medyo alanganin pa ang Mali, naghihintay pa tayo ng kumpirmasyon kung sasali sila, pero magiging magandang tournament 'to para sa Filipinas," pahayag ni Freddy Gonzalez, PFF national team director, sa open training session ng Filipinas sa Rizal Memorial Stadium noong Biyernes.
"Inaasahan natin na andiyan ang mga overseas-based players, kaya makikita natin ang mga tulad nina Sarina Bolden. First time na magkakasama ang buong senior team. Kaya exciting 'to, something to look forward to."
Mas kapana-panabik pa ang mga susunod na kaganapan dahil tatlong matches ang lalaruin ng paboritong national team sa sariling bayan sa Rizal Memorial Coliseum.
Natapos na ang maikling local-based camp ng Filipinas noong Biyernes, ngunit ayon kay Gonzalez, mas marami pang activities ang naghihintay sa pagtatapos ng taon. Kasama ang Filipinas U-20 team, lalaro ang senior team sa kanilang unang opisyal na laban sa Maynila mula nang manalo sa 2022 AFF Women’s Championship dalawang taon na ang nakaraan.
"Ang November talaga ang abangan. Dalawang windows yan, may men's, then may women's. November 14 nasa Hong Kong ang men's, tapos November 19 dito sa atin, at tatlong matches dito para sa women’s kasama ang U-20s," ani Gonzalez.
"Ang women's U-20s magsisimula ng November hanggang December, tapos may Mitsubishi Cup na nare-schedule sa December 9. So sa isang buwan, pito ang home games natin between Filipinas at men's team."
Bahagi ang mga laban na ito ng patuloy na paghahanda ng mga teams para sa mga darating na kompetisyon. Para sa Filipinas, lalo silang naghahanda para sa abalang 2025 na tampok ang Southeast Asian Games at ang AFF Women’s Championship.
"Mukhang magkakaroon tayo ng isa o dalawang magagandang kompetisyon para sa team na magpapatuloy sa pagbuo at paghahanda para sa susunod na taon na tiyak na busy," sabi ni Filipinas head coach Mark Torcaso.
"May AFF tayo, SEA Games, at ilang U-20 qualifiers at iba pang bagay. Kaya ngayong taon, magfo-focus tayo doon: lalaro ng magagandang laban at may mga magandang plano tayo."
May mga hamon nga lang sa mga darating na home games, lalo na't inaasahang aayusin na ang pitch sa Rizal Memorial Stadium. Pero dahil malapit na ang mga laban, sinabi ni Gonzalez na hihilingin nilang ipagpaliban muna ang pagpalit ng pitch.
"Oo, medyo hindi ideal pero susubukan natin na magawan ng paraan. Tiningnan na rin namin ang ibang venues pero hindi feasible. Hihilingin natin na i-delay muna ang pag-install ng bagong pitch," ani Gonzalez.
"Pipilitin na lang natin na i-refurbish at pagandahin itong existing turf para sa mga laban ngayong Nobyembre at Disyembre."
Mas maraming detalye tungkol sa mga laban sa Maynila ang ilalabas habang papalapit na ang mga petsa ng laro.
