Tagalog
– Halos nakuha na ng Capital1 Solar Spikers ang panalo laban sa Cignal HD Spikers, pero kinapos pa rin kahit na ibinuhos na lahat ni Russian import Marina Tushova ang kanyang 50-point performance sa quarterfinals ng PVL Reinforced Conference sa FilOil EcoOil Centre, San Juan nitong Sabado ng gabi.
Bagamat ito pa lang ang kanilang ikalawang conference sa PVL, at unang playoffs appearance, hindi pa rin sapat ang kanilang lakas para mapanatili ang kanilang Cinderella run.
"Nakikita ko na nag-enjoy ang team ko at fans sa laban na ito. Ibinigay ko lahat para sa game na 'to," ani Tushova matapos ang masakit na pagkatalo sa limang sets. "Kailangan lang namin ng kaunting kaunti pa. Hindi ko na iniisip ang record ko, mas gusto ko na manalo para sa team namin. Pero sana magkaroon kami ng isa pang pagkakataon."
Sa kabila ng pagiging standout sa torneo, kung saan tatlong beses niyang binali ang PVL scoring record sa loob ng siyam na laro, alam ni Tushova na may unfinished business pa siya sa Pilipinas. Kahit na papunta na siya sa ibang bansa at club, plano pa rin niyang bumalik.
"Sana makabalik ako dito at maging mas mahusay pa next year. Gusto kong magdala ng mas higit pa sa Capital1, sa amazing na team na ito," dagdag pa niya.
Bagamat si Tushova ang naging sentro ng tagumpay ng Capital1, sinabi rin niya na marami siyang natutunan mula sa kanyang team at karanasan.
"Tinuruan ako ng team na magtiwala sa sarili. Dito ko natutunan na maniwala sa sarili ko, dahil sa suporta ng team at fans," kwento niya. "Pinasasalamatan nila ako, sinusuportahan nila ako. Mas naniniwala sila sa akin kaysa sa sarili ko, at natutunan ko iyon dito. Sana mas mapabuti ko pa ito."
Sa kabila ng kanyang record-breaking performances, papunta na si Tushova sa Azerbaijan para maglaro sa isang club team doon. Ngunit dadalhin niya ang aral na natutunan niya sa Pilipinas.
"Minsan masyado akong seryoso, pero natutunan ko rito na pwede kang ngumiti habang nagtatrabaho nang mabuti. Gusto ko itong ipagpatuloy," pagtatapos ni Tushova.
READ: Cignal HD Spikers, Nakahinga ng Maluwag Kahit sa 50 Puntos ni Tushova!
