Tagalog
— Siniyasat ng Jollibee Group ang isang cybersecurity incident na maaaring nag-kompromiso sa mga rekord ng milyun-milyong kostumer.
Sa kanilang pahayag, binigyang-diin ng Jollibee Group na ang kanilang mga e-commerce platform ay ligtas at patuloy na gumagana.
"Siniseryoso namin ito at sinimulan na namin ang isang imbestigasyon upang mas maintindihan ang saklaw ng insidente," sabi ng Jollibee Group.
Nagpatupad na ng response protocols at pinahusay na seguridad upang maprotektahan ang datos laban sa mga banta.
"Kasabay ng mga hakbang na ito, nakikipagtulungan kami sa mga awtoridad at eksperto," dagdag nila.
"Tinitiyak namin sa publiko na patuloy naming pinapalakas ang aming depensa laban sa mga darating pang banta at nananatiling committed sa pangangalaga ng data ng mga kostumer," anila.
Hinikayat din ng grupo ang publiko na maging mapagbantay at sundin ang mga tamang practices sa information security, gaya ng pagpapanatiling ligtas ang mga password at regular na pagpapalit nito.
Kasama sa mga brand sa ilalim ng Jollibee Food Corp. ang Greenwich, Red Ribbon, Burger King Philippines, at Highlands Coffee.
Samantala, sinabi ng Department of Information and Communications Technology (DICT) na makikialam lang sila sa mga imbestigasyon sa cybersecurity breach ng mga pribadong kompanya kung hihilingin ito.
Nilinaw ni DICT Undersecretary Jeffrey Ian Dy na kung mga pribadong kompanya ang apektado, karaniwang hindi sila nakikialam – maliban kung aktibong hihingi ng tulong.
Dagdag ni Dy, ang National Privacy Commission (NPC) ang kadalasang humahawak ng mga cybersecurity attack na kinasasangkutan ng mga pribadong entidad.
