Tagalog
Sa tumitinding panganib ng sakit sa puso at diabetes sa Pilipinas, mga doktor ang nagbabala at nagbigay ng mga tips sa publiko upang ingatan ang kanilang kalusugan.
Batay sa pinakabagong datos mula sa Philippine Statistics Office, ang ischemic heart disease ang nangungunang sanhi ng kamatayan sa Pilipinas noong 2020 at 2021. Lumobo pa ito mula sa mahigit 95,000 noong 2020 patungo sa halos 126,000 noong 2021. Samantala, ang bilang ng namatay dahil sa diabetes mellitus ay umabot sa 44,000 noong 2021, na may 22% na pag-akyat mula sa nakaraang taon.
Sa isang kamakailang press conference na may temang "Confessions of a Sweet Talker: How Your Sweet Tooth Can Cause Heartaches," binahagi nina Philippine Heart Association Secretary Dr. Rodney Jimenez at Philippine College of Endocrinology, Diabetes and Metabolism president Dr. Carolyn Narvacan-Montano ang mga paraan para maiwasan ang sakit sa puso at diabetes.
"Susundan ko ang aking adbokasiya, ang 5100 – limang servings ng prutas at gulay kada araw, isang oras ng ehersisyo o kung hindi kaya ay kahit isang minuto kada oras ng paggalaw, anumang klaseng galaw; zero smoking at zero sugary beverages," sabi ni Dr. Jimenez.
"Dahil nga sa trabaho, kailangan ring gumalaw nang kaunti kada oras dahil alam mo naman, ang pag-uupo ay parang paninigarilyo. 'Di ba't may mga opisina na nakatayo sila? Mayroon silang standing desk," dagdag pa niya.
Para naman kay Dr. Montano, may tatlong K na dapat labanan upang maiwasan ang diabetes.
"Tatlong K ang dahilan kung bakit nagkakaroon ng diabetes: katakawan, katabaan at katamaran. Kung matalo mo ang tatlong K na yan, maaari nating iwasan ang mga sakit tulad ng diabetes at hypertension," pahayag niya.
Sumang-ayon si Montano sa pahayag ni Jimenez, at ibinahagi na ang kanyang mga hapon sa klinika ay naka-tayo.
"Mayroon akong adjustable desk kaya 'pag nangangalay na ako, ibababa ko lang ito. Karamihan ng aking hapon sa klinika ay naka-tayo. Ang dahilan ay kung nangangalay ka sa pagtayo, lalakad ka. Kung nangangalay ka naman sa pag-upo, mag-strestretch ka lang, kaya't walang masyadong nawawalang calories," paliwanag niya.
Ang forum ay inorganisa ng For Your Sweetheart Philippines, isang kilusang pangkalusugan na inilunsad ng Boehringer Ingelheim Philippines, upang magbigay kamalayan sa kahalagahan ng koneksyon ng diabetes at sakit sa puso.
Mga nagsalita sa event ay nagmungkahi na bisitahin ang isang online site upang malaman ang mga panganib sa kalusugan. Isa sa mga tool na ito, ang Framingham Assessment Test, ay isang libreng online exam na nagkokompute ng panganib ng pagkakaroon ng cardiovascular disease base sa mga impormasyon tulad ng cholesterol levels at blood pressure.
"Ang mga online tools tulad ng Framingham Assessment Test ay makakatulong upang makita ang larawan ng iyong kalusugan bago kumonsulta sa doktor," sabi ni Leyden Florido, Presidente ng Philippine Association of Diabetes Educators. "Ang mga resulta ay maaaring dalhin sa doktor para sa tamang interpretasyon at aksyon."
Ang Framingham Assessment Test ay tumatagal lamang ng 10 minuto at maaari itong gawin sa www.foryoursweetheart.ph. Pinapayuhan din ang mga taong walang kasaysayan ng sakit sa puso na gawin ito.
Unang inilunsad noong 2020, layunin ng For Your Sweetheart PH na patuloy na magbigay edukasyon sa mga Pilipino tungkol sa koneksyon ng diabetes at sakit sa puso, pati na rin kung paano ito maayos na pangalagaan. Sinusuportahan ang kampanya ng Philippine Heart Association (PHA), Philippine College of Endocrinology, Diabetes and Metabolism (PCEDM), Alliance of Clinical Endocrinologists (ACE), Diabetes Philippines (DP), Institute for the Studies of Diabetes Foundation (ISDF), Philippine Association for Diabetes Educators (PADE), at Philippine Alliance Patient Organizations (PAPO).
