Tagalog
— Nabigo ang Pinoy chess team makapanatili sa top 10 ng 45th FIDE Chess Olympiad matapos talunin ng powerhouse Armenia, 2.5-1.5, sa isang mainit na laban sa BOK Sports Hall nitong Lunes.
Nagsimula ng maayos ang kampanya ng Pilipinas nang si Grandmaster (GM) Julio Catalino Sadorra ay pinatiklop si Super GM Haik Martirosyan matapos ang 63-move win gamit ang Nimzo-Indian defense. Isang matamis at maingat na diskarte ni Sadorra ang nagbigay sa mga Pinoy ng 1-0 lead.
Mukhang nakatutok na sa draw sina GM-elect Daniel Quizon, International Master Paulo Bersamina, at GM John Paul Gomez sa kani-kanilang board positions. Ngunit tila kinapos ang mga Pinoy sa huling sandali.
Si Quizon ay bumigay kay GM Shant Sargsyan sa Board 2, habang si Gomez naman ay natalo ni GM Robert Hovhannisyan sa Board 4. Hindi rin nagawang itulak ni Bersamina ang pawn advantage sa Board 3 at napilitang mag-draw kay GM Gabriel Sargissian.
Bagsak ang Pinoy team mula top 10 papunta sa shared 21st spot, tangan ang 8 match points. Pero may positibong balita pa rin, dahil nananatiling undefeated si Sadorra, kumakolekta ng 3.5 points mula sa apat na laro at isang pambihirang performance rating na 2879. May tsansa pa siyang makapag-uwi ng individual medal sa top board.
Sa women’s division, bumawi naman ang Filipinas sa Bolivia sa score na 3-1. Tinambakan nina Shania Mae Mendoza, Janelle Mae Frayna, at Jan Jodilyn Fronda ang kanilang mga katunggali sa top 3 boards. Si Bernadette Galas lang ang nagbigay ng punto sa kalaban matapos matalo kay Jessica Molina.
Dahil sa panalo, umakyat ang Filipinas sa shared 22nd spot kasama ang 8 points.
Ang laban ay muling magpapatuloy pagkatapos ng isang araw na pahinga. Ang Pinoy men’s team ay makakaharap ang Croatia (seeded 27th), habang ang women’s team ay sasabak sa Argentina (seeded 26th) sa pag-asang makuha ang panalo at manatiling kontender.
“Recharge lang muna kami, tuloy ang laban bukas,” sabi ni Coach Jayson Gonzales, na siya ring CEO ng NCFP.
